قصه بقلمي سكون

قصه بقلمي سكون
السلام عليكم ورحمة الله وبركاته
يسعد صباح الجميع ومسائه
هذي قصة كتبتها في مسابقه في احد المنتديات
وكانت اول قصه لي فحبيت انزلها هنا
قراءة ممتعة .

احداث القصه تدور حول اربعة شبان
هم عبدالله وفيصل وفهد ومحمد
طبعا هم ربع من زمااان
ومن حاره وحده وتقريبا دراسين مع بعض كل المراحل
وتوهم متخرجين من الثانوي
بدت الاجازه وفي يوم 9/8 الساعه 10 مساءَ
اجتمعوا في بيت عبدلله
وجلسوا في بيت الشعر
وهم يتابعون المباراه
قال فهد يا عيال في بيت جديد ورى بيت عمي
يقولون فيه اصوات غريبه وصياح وعيال يبكون وحرمه تصارخ
قاطعه فيصل وقال : تبي تخوفنا انت وراسك تابع بس تابع .. طبعا فيصل خواف درجه اولى بس قول جنمه جن يقمط اوم العافيه
قال محمد: كمل كمل ما عليك منه .. معك انا
وعبدلله مشغول بالفصفص (حب) ما يعرف يقشرره
قال فهد: فصيل انطم يالرخمه واسكت لا اكمخك بالبيبسي
الزبده يا عيال
البيت مقروشهم ومزعجهم ما يقدرون ينامون من الازعاج والخوف
وش رايككم نداهم البيت
عبدلله بعد ما فقد الامل انه يفك قشر الفصفص صار ياكله بقشوره : قال متى المداهمه
فيصل : كل تبن انت وضروسك وش متى وانت (يقصد فهد) صاحي وش نداهم
محمد بهاللحظه لقط صوره لوجه فيصل وهو خايف ويقول باستهبال : يا حرام شفيكم انتوا خوفتوا الولد
فيصل : جيب الجوال يا كلب فاضي تصور جيييب!!
عبدالله وفهد : بصوت عالي وضحك لا تعطيه .. لا تعطيه
فهد : ارسلها لي بسرعه بسويها برودكاست وارسلها لشباب
محمد : ابشررر
عبدالله وهو متقروش مع الفصفص : شنب ي بعدي ارسلها له
طبعا فيصل وصل حده واخذ الموضوع بجديه وقال : لا ابوكم ولا ابو من جلس معكم يالجحلط
وطلع من الخيمه
واصوات الشباب وراه ينادون: ياولد نمزح تعال
محمد : ما عليكم منه بكرا بيجي يضحك يدور الصوره علشان يظبطها ويحطها عرض
ضحكوا الشباب
فيصل بالطريق : تطري عليه سالفة البيت وجااه فضول غريب يمره ويشووف شكله
(طبعا فيصل زي ما شفتوا بالبدايه خواف لكنه مهايطي بس قلبه ابيض وطيب)
المهم وهو يقاوم رغبته وخوفه في انه يقاوم الخوف
تذكر كلام العيال عنه لما يسبونه ويعيرونه بخوفه
اتخذ قراره وليته ذا المهايطي ما قرر
والقرار انه يروح ينخمد بالبيت ابرك له من الهياط

اذن الفجر ودخل ابو فيصل على فيصل علشان يصحيه للصلاه
ولقى ولده يهذر وهو نايم وواضح من وجهه انه منخرش
قال ابوه : بسم الله وش بلاه الولد
فيصل وهو نايم : محمد تكفى تعال
ويسكت ويقول وراك وراك بعدين يقول عبدالله قراش الفصفص بيجيب لك الزائده
ويرجع يصارخ
ابوه : ياولد قم صل وش بلاك تهذر مع الفجر قم يله بسرعه
فيصل : باقي نايم >> نومه ثقيل
ابوووه : فصيلل ويمسك العقال وجلده قوم يا ولد
فيصل : ااه هلا يبه ابشر ابشر الحين بالحقك المسجد
ابوه : قم توضى انت واخواياك لجيتنا فيهم
والله ان ما شفتك بالمسجد ما تلوم الا نفسك
فيصل : ابشر ابشر بتشوفني باول صف

وكالعاده فيصل رجع انخمد ونسى كلام ابوه والصلاه
ورجع ابوه وقعد يهاوشه وهذا حاله دايم

الساعه 7ونص صباح دق الجوال عليه رد وما شاف مين المتصل
قال : الو
وصار يسمع صوت صراخ وشوشه
واحد يقول يساعدني
قال : مين الوو
ناظر ع الاسم طلع فهد
رجع يكلم فهد فهد تسمعني فهد رد
وصار يسمع صوت فهد من بعيد يصارخ
يقول فيصلل ساااعدني
وصار يقطع الصوت اناااا ف ف ف البيت ال ال وانقطع الخط
دق على محمد جواله مغلق
دق على عبدالله وطلع نفس الشي مغلق
قعد يتحلطم وهو خااايف
وفجئه تذكر انه ما صلى الفجر
نقز وضى وصلى
وراح لبيت عبدالله مالقى سيارته وراح لبيت محمد ونفس الشي مالقى سيارته
راح بيت فهد ولقى سيارة عبدالله ومحمد ومالقى سيارة فهد
قعد يفكر ويمخمخ بالسالفه اعتقد انه مقلب بس تراجع وقال شكلهم راحوا البيت الي قال عنه
فهد مالي الا اني اروح بيت عمه واشوف ذا البيت وينه
وبالفعل حس فيصل بشجاعه وراح
وصل بيت عم فهد وهو يتلفت يدور البيت مالقاه كل البيوت فيها ناس
وتذكر ان البيت ورى بيت عم فهد
وراح الشارع الي ورى البيت
ولقى البيت باقي عظم لكن مبين انه مبني من قريب
ويقرب بالسياره لين وقف قدام الباب
فجئه تذكر ان البيت غريب ويمكن يكون مسكون ورجع ورى بسرعه من الخوف
وتقدم وهو يقول في نفسه ما عاش من يخوفك يالذيب
المهم لبق السيارة ونزل وهو يمشي حولين البيت دعس على لوحة سيارة
ويشيلها الا وتطلع لوحة سيارة فهد ويصرخ من الخوف ولف يبي يرجع
يركب السيارة لقى رجالين جالسين على كبوت السياره
واحد قزم متلطم بالشماغ واحد طويل اسمر لابس طاقيه
قال فيصل : لو سمحتوا ممكن تجلسون مكان ثاني انا بمشي
كلهم التفتوا بهدوء وبنفس الوقت وقعدوا ينظارونه
طبعا انخرش وقال : في شي يا شباب
والرجالين معلقين على نفس النظرات
قال الصغير : كلام غير مفهوم خرابيط بس صوته يخرع
التفت الطويل على الصغير وصفقه في راسه
رجع الصغير تكلم بكلام مفهوم وقال : اسمع ياورع روح من هنا ولا عاد اشوف وجهك
صدقني لو منت خايف كان لحقتك الي راحوا
فيصل وهو مرتبك : وش تقصد مين الي راحوا
الصغير : اركب سيارتك وتوكل وانسى الي جيت علشانهم
فيصل انفعل : وش تقول وين فهد ومحمد وعبدلله رد ي حيوان
قام الطويل وكل ماله ما يزيد طوله ويشتد سماره وعيونه تحمر
ويقرب من فيصل
فيصل بهالحظه تلعثم وخاف ومن الخووف
هج وهو يصرخ جني جني جني ؟
ورجع لبيت عم فهد
ويدق الباب بقوه وهو يصرخ
افتحوا افتحووا
مامن مجيب
رجع يركض لين وصل الشارع العام ويصارخ ساعدوني اخوياي اختفوا
وقفت سيارة فهد وفتح الشباك ويقول سلامات وش فيك انخبلت
فتح محمد الشباك الي ورى
وقال اركب يا رخمه ناظر للي جنب فهد لقى عبدلله ياكل فصفص بقشوره
ركب معهم وهو منصدم وسرحان محمد قال لفيصل :تبي بيبسي
فيصل ما رد وخذو مطب قوي وبعدها صحصح فيصل
وضحك وقعد يضم محمد ويقول الحمدلله الحمدلله
قال محمد : يا عيال البراغيث ازعجتني زادت هالايام برجلي
ويرفع رجله الاوهي رجل حماااااااااار
فيصل صرررخ بصووووووووووووووووووووووت عاااااالي
يييييييييييييمممممممممممممممممممه يممممممممممممممممه ويصرخ
ويبكي >> مالومه والله
وقال عبدالله وش فيك تخاف من البراغيث شف رجلي
مليانه ويرفع رجله وتطلع رجل عنز
وبهالحظه اغمى على فيصل
وفجئه
انكبت عليه موووويه
من اخته الصغيره وتقول قوم الحق ع المسجد اقامت الصلاه
قبل لا يجي ابوي ويجلدك قم بسرعه
لي ساعه اصحيك وانت تصارخ وتبكي
شفت لانك ما تصلي

ونقز من فراشه وهو مستانس ويقول حلم حلم
وراح وضى وصلى ورجع مع ابوه
وابوه فرحان بولده

وتوته توته خلصت الحتوته
هذي اول قصه اكتبها
ولا تخلو من الاخطاء (استخدمت الالفاظ المتداوله
بين الشباب لكي تصبح اقرب للواقع)
واي انتقاد او اي شي التقيم موجود
لا احلل النقل بدون ذكر المصدر